Innlent | mbl | 30.5.2008 | 11:59 | Uppfært 12:14

Smíði Vestmannaeyjaferju boðin út á ný

Vestmannaeyjahöfn. mbl.is/GSH

Ríkisstjórnin hefur að tillögu samgönguráðherra ákveðið að falla frá hugmyndum um smíði Vestmannaeyjaferju í einkaframkvæmd. Í stað þess verði smíði ferju boðin út með hefðbundnum hætti og í framhaldi af því verði rekstur hennar boðinn út sérstaklega. Talið er að smíði nýrrar ferju taki um tvö ár.

Samgönguráðherra fól Siglingastofnun Íslands í fyrra að annast útboð í einkaframkvæmd á ferjusiglingum milli Vestmannaeyja og fyrirhugaðrar Landeyjahafnar í Rangárþingi eystra. Var það í samræmi við gildandi samgönguáætlun. Skyldi verktaki byggja ferju samkvæmt nánari skilgreiningu og annast rekstur hennar í 15 ár.

Fjórum aðilum var gefinn kostur á að bjóða í verkið að undangengnu forvali. Tveir ákváðu að skila ekki tilboði en tilboð bárust frá Samskipum hf. annars vegar og hins vegar sameiginlega frá Vinnslustöðinni hf. og Vestmannaeyjabæ (V&V). Tilboð Samskipa uppfyllti ekki lágmarkskröfur útboðsgagna og var dæmt ógilt. Tilboð V&V var talið gilt en auk aðaltilboðs bárust nokkur frávikstilboð.

Samgönguráðuneytið segir, að ekkert tilboðanna hafi þótt viðunandi vegna kostnaðar og var þeim hafnað en ákveðið að fara í samningsviðræður við V&V. Niðurstaðan er sú að aðaltilboðið er 45% hærra en kostnaðaráætlun Siglingastofnunar og frávikstilboðið um 30% hærra. Almenn regla Siglingastofnunar sé að taka ekki tilboðum sem eru 10% hærri en kostnaðaráætlun.

Segir ráðuneytið, að í ljósi þessa hafi verið talið rétt að leggja á hilluna allar hugmyndir um einkaframkvæmd á Vestmannaeyjaferju þar sem telja má aðstæður á lánamörkuðum þeirri aðferð mjög óhagstæðar um þessar mundir. Í stað þess verði Siglingastofnun Íslands falið að bjóða út smíði nýrrar Vestmannaeyjaferju með hefðbundnum hætti í eiginframkvæmd ríkisins. Síðar verði rekstur ferjunnar boðinn út á sama hátt og gert hafi verið undanfarin ár.

Talið er að smíði nýrrar ferju taki um tvö ár. Ný lög um Landeyjahöfn voru samþykkt á Alþingi í nótt. Hafnargerðin og lagning nýs Bakkafjöruvegar eru í útboðsferli og verða tilboð opnuð þann 5. júní.