Sláttur hafinn í Eyjafirði

Hörður Snorrason bóndi í Hvammi í Eyjafirði hóf að slá klukkan 10 í morgun. Að sögn Harðar hefur sprettan verið góð og ekki hefði mátt bíða mikið lengur með að slá. Sláttur er almennt að hefjast í Eyjafjarðarsveit og var m.a. slegið tún á Holtsseli í gær.

„Tíðin hefur verið góð og blautt í grasinu, sérstaklega miðað við hvernig þetta var í fyrra," segir Hörður. „Það munaði mikið um rigninguna á laugardaginn og grasið hefur þotið upp."

Máni Jóhannesson verktaki sá um sláttinn fyrir Hörð, en traktor Harðar var upptekinn í moldarvinnu.

Nánar verður fjallað um túnaslátt í Eyjafirði á vefvarpi mbl.is síðar í dag.