Mun betri horfur í arnarvarpi en í fyrra

„Horfur í varpi eru mun betri en í fyrra,“ segir Kristinn Haukur Skarphéðinsson, fuglafræðingur hjá Náttúrufræðistofnun Íslands. Í fyrra hafi 34 pör verpt en í ár sé vitað um 43 hreiður. Þá hafi tíðarfar verið örnunum hagstætt en ungarnir séu mjög viðkvæmir fyrir hretum í upphafi varps. „Útlitið er gott,“ bætir hann við, en endanlega verði ljóst hversu margir ungar komist á legg í lok þessa mánaðar.

Bergsveinn Reynisson og Signý M. Jónsdóttir á Gróustöðum við Gilsfjörð hafa lengi ætlað að koma upp vefmyndavél við arnarhreiður og hafa nú sótt um leyfi fyrir uppsetningunni til Umhverfisstofnunar. Útlit er fyrir að það takist fyrir lok júní og verður þá hægt að fylgjast með hreiðrinu á vefsíðu Reykhólahrepps, reykholar.is. Nú sé verið að leita að heppilegu arnarhreiðri, en „þetta verður sett upp við næsta skógarþrastarhreiður ef ekkert skárra finnst, þetta er búið að standa til í svo mörg ár,“ lofar Bergsveinn.

Kristinn segir langa hefð vera fyrir notkun slíkra véla erlendis og trufli þær ekki fuglana sé þeim rétt komið fyrir. | andresth@mbl.is