Olíumál björgunarsveitar látið niður falla

Umferðareftirlit Vegagerðarinnar hefur sent forsvarsmönnum Björgunarfélags Akraness tilkynningu þar sem fram kemur að athugun,  sem fram fór á eldsneyti á bifreið björgunarfélagsins í maí, muni ekki leiða til frekari aðgerða af hálfu Vegagerðarinnar.

Björgunarsveitir nota svonefnda litaða olíu á bíla sína en sú olíu er undanþegin olíugjaldi. Snérist athugun umferðareftirlitsins um hvort félagar í björgunarfélaginu hefðu í þetta skipti verið að sinna erindum sem  ekki tengdust hefðbundinni starfsemi björgunarsveita. 

Ásgeir Örn Kristinsson, formaður Björgunarfélags Akraness, segir á heimasíðu félagsins að þetta mál og sú umfjöllun sem það fékk hafi komið illa við félagið. „Það er óþægilegt að vita til þess að einhverjum detti í hug að starfað sé eftir öðrum markmiðum í okkar félagskap heldur en að bæta samfélagið okkar. Engin ástæða var fyrir þessari könnun, eftirlitsmönnunum var gerð rækileg grein fyrir því að lituð olía væri á tanknum og verkefni bílsins og hópsins var í fullu samræmi við verkefni Björgunarfélags Akraness," segir Ásgeir. 

Hann segir að þessu máli sé lokið af hálfu Vegagerðarinnar en ekki af hálfu félagsins. „Eftir stendur að við þurfum að leggjast í rannsóknarvinnu og skoða hvort það lagaumhverfi sem við vinnum í er á einhvern hátt gallað. Hvort í því eru glufur sem við gætum dottið óvart í. En ég vona að enginn haldi því fram að við séum að brjóta vísvitandi á samborgurum okkar því  það er fjarstæða."

Heimasíða Björgunarfélags Akraness 

• 2 blogg um fréttina

Bloggað um fréttina

• Anna Heiða Stefánsdóttir: olíumál
• Guðrún Emilía Guðnadóttir: Björgunarsveitarmálið á Akranesi.