Innlent | mbl | 11.6.2008 | 17:16

Skoðanir í ímyndarskýrslu á skjön við nýjustu sagnfræðirannsóknir

Sagnfræðingafélag Íslands hefur sent forsætisráðherra bréf, þar sem bent er á að í nýlegri skýrslu um ímynd Íslands komi söguskoðun, sem sé skjön við sagnfræðirannsóknir síðustu 30-35 ára.

Um er að ræða kafla í skýrslunni þar sem segir: Fyrstu Íslendingarnir voru fólk sem kom hingað í leit að frelsi og betri lífsskilyrðum. Þjóðin bjó lengstum við kröpp kjör en þegar hún fékk frelsi og sjálfstæði tók hún stökk frá því að vera þróunarland til þess að verða ein ríkasta þjóð í heimi á innan við öld. Íslendingar eru dugleg og stolt þjóð, mótuð af lífsbaráttu í harðbýlu landi. Mikilvægasti menningararfur Íslendinga, íslensk tunga, lifir í máli þjóðarinnar og í bókmenntum hennar.

Sagnfræðingafélagið segir, að þessi söguskoðun sverji sig fremur í ætt við þá söguskoðun sem mótuð var í sjálfstæðisbaráttunni í pólitískum tilgangi. „Þeirri söguskoðun hafa fjölmargir sagnfræðingar andmælt síðustu áratugi og komið fram með sannfærandi rök sínu máli til stuðnings. Greina má goðsagnir á borð við frelsisþrá landsnámsmanna og nýja gullöld í kjölfar sjálfstæðis sem voru meðal þeirra sem skapaðar voru til að réttlæta sjálfstæðiskröfuna. Einnig má sjá að nútímahugtök og –viðmið eins og „betri lífsskilyrði" og „þróunarland" eru notuð yfir fortíð þar sem óvíst er að þau hafi haft nokkuð gildi," segir í bréfinu.

Þá segir, að þessar staðhæfingar um sögu íslensku þjóðarinnar geti varla samræmst skilgreiningu nefndarinnar á árangursríkri ímyndaruppbyggingu nema að því leyti að umræddar goðsagnir eigi sér sannarlega djúpar rætur.