Endurheimta hinn forna Brimnesskóg

 Samningur Sveitarfélagsins Skagafjarðar og Brimnesskóga undirritaður, sem var undirritaður nýverið, gerir ráð fyrir afnot af landi því, þar sem talið er að Brimnesskógur sá sem nefndur er í íslenskum fornritum hafi verið. Það er Steinn Kárason umhverfisstjórnunarfræðingur M.Sc. og garðyrkjumeistari sem er frumkvöðull að félagsstofnuninni. Markmið félagsins er að endurheimta hina fornu Brimnesskóga í Skagafirði með kynbótabirki, kynbættum reyni og víði úr Hrolleifsdal og Austurdal í Skagafirði.

Í samtali við Stein kom fram að nú er frágengið að félagið fær alls nær fimm tugi hektara lands til að hrinda áformun sínum í framkvæmd, en áður var búið að afmarka félaginu nokkurn landsskika þar sem undanfarin nokkur ár hefur verið plantað völdum plöntum sem ættir eiga að rekja til gömlu birkiskógaleifanna í Fögruhlíð í Austurdal og í Hrolleifsdal.

Fram til þessa hefur eingöngu verið plantað út ársgömlum plöntum í rúmlega tíu hektara lands, en nú, eftir að samningur er frágenginn, munu á næstu dögum verða settar niður á þriðja þúsund skógarplöntur, um tvö hundruð vefjaræktuð reynitré og um þrjátíu móðurtré af kynbættu birki, sem ætluð eru í framtíðinni til frætöku.

Sagði Steinn ánægjulegt að þessi samningur væri nú loks í höfn og því unnt að vinna því máli framgang af fullum þunga, að skila landinu til baka eins og það var á fyrstu árum byggðar í Skagafirði. Þá sagði hann mjög vaxandi áhuga á verkefninu bæði meðal heimamanna, en ekki síður á meðal brottfluttra Skagfirðinga.