Sumarbústaður skemmist í eldi

Verulegar skemmdir urðu á sumarbústað í Svarfhólslandi í Svínadal þegar eldur kviknaði í honum í gærkvöldi.  

Tilkynnt var um eldinn um klukkan 22 og fór slökkvilið Akraness og Hvalfjarðarsveitar á staðinn ásamt lögreglu úr Borgarnesi. Eldurinn kviknaði á verönd framan við bústaðinn og náði að læsa sig í klæðningu hússins og þak. Þetta má lesa á fréttavef Skessuhorns.

Eldri hjón sem voru í húsinu náðu að koma sér út en maðurinn brenndist lítillega þegar hann reyndi að hefta útbreiðslu eldsins. Nágrannar brugðust skjótt við og komu til aðstoðar. Að sögn eigandans höfðu þeir náð að slökkva eldinn að mestu þegar slökkviliðið kom á staðinn, sem þó tók stuttan tíma.

Slökkviliðið rauf þak hússins til að komast fyrir glóð en eldurinn hafði náð að fara í gegnum þakið yfir veröndinni.

Hjónin sem voru í bústaðnum höfðu nýlega fest kaup á honum og ætluðu að gista þar í fyrsta sinn um nóttina.

Eldsupptök eru ekki að fullu ljós en grunur er þó um sjálfsíkveikju í málningarvörum sem geymdar voru á veröndinni.

Tjónið er umtalsvert því auk beinna skemmda af eldinum fór reykur og sót um allt húsið til viðbótar kvoðu úr slökkvitækjum.

• 1 blogg um fréttina

Bloggað um fréttina

• Haraldur Bjarnason: Lágkúruleg blaðamennska og þjófnaður