Bifreið bjargað úr Markarfljóti

Verið var að draga í land bifreið sem festist í Markarfljóti í kvöld. Ökumaðurinn gat synt í land en bifreiðin flaut fleiri hundruð metra niður ána.

Það var um níu leytið í kvöld sem lögreglan á Hvolsvelli fékk tilkynningu um að jeppi hefði fests í Markarfljóti, rétt við gömlu brúna, Þórsmerkurmegin. Er að var komið var maðurinn kominn í land og hafði hann náð að synda í land. Er hann ómeiddur en kaldur af volkinu í jökulánni.

Bifreiðin sjálf flaut hins vegar fleiri hundruð metra niður ána áður en björgunarsveitin Dagrenning á Hvolsvelli náði að koma henni í land.

Mennirnir höfðu verið tveir í bílnum en beið annar á landi meðan hinn keyrði út í ána. Ætlaði ökumaður að snúa við og fara aftur upp en sá ekki kant sem er við árbakkann og rann bifreiðin þá aftur ofan í.

• 2 blogg um fréttina

Bloggað um fréttina

• Helga R. Einarsdóttir: Hér vantar einhvern nokkrar "blaðsíður"
• Kjartan Pétur Sigurðsson: MARKARFLJÓT - BRÚ - MYNDIR