Innlent | mbl | 19.6.2008 | 11:41

Ráðuneytið greiðir 245 þúsund fyrir leiguflug á Sauðárkrók

Þórunn Sveinbjarnardóttir, umhverfisráðherra, var á Skaga þegar ísbjörninn var drepinn. mbl.is/Skapti

Vegna misvísandi frétta um ferðalög umhverfisráðherra í tengslum við björgun hvítabjarnarins á Skaga vill umhverfisráðuneytið koma því á framfæri að Þórunn Sveinbjarnardóttir umhverfisráðherra fór til útlanda í einkaerindum um liðna helgi. Hún kom til landsins með áætlunarflugi en ráðuneytið greiddi 245.000 krónur fyrir leiguflug með sjö farþega til Sauðárkróks á þjóðhátíðardaginn.

„Á mánudag hafði ráðuneytisstjóri umhverfisráðuneytisins samband við umhverfisráðherra og tilkynnti honum um landtöku hvítabjarnar í Skagafirði. Umhverfisráðherra var í stöðugu sambandi við ráðuneytið og Umhverfisstofnun í kjölfarið og hafði meðal annars milligöngu um að koma á samstarfi við dýragarðinn í Kaupmannahöfn um björgun hvítabjarnarins.

Umhverfisráðherra kom til Íslands síðdegis þriðjudaginn 17. júní með áætlunarflugi eins og ráð hafði verið fyrir gert. Umhverfisráðuneytið leigði flugvél af flugfélaginu Ernir til að fljúga með umhverfisráðherra og viðkomandi starfsfólk umhverfisráðuneytisins og Náttúrufræðistofnunar Íslands frá Keflavík til Sauðárkróks.

Starfsfólk ráðuneytisins sá m.a. um samskipti við lögreglu, Landhelgisgæslu og fjölmiðla og samskipti við grænlensku heimastjórnina vegna óska um að fá að flytja hvítabjörninn þangað.

Starfsfólk Náttúrufræðistofnunar Íslands þurfti að vera á vettvangi ef til þess kæmi að fella þyrfti björninn. Umhverfisráðuneytið greiðir 245.000 kr. fyrir leiguflug með sjö farþega. Flogið var með áætlunarflugi til baka um kvöldið," að því er segir í tilkynningu frá umhverfisráðuneytinu.