94,6% vilja yfirvinnubann

Á fundi hjá Félagi íslenskra hjúkrunarfræðinga í dag kom fram að mikill meirihluti hjúkrunarfræðinga styður áætlun um að boða til og fara í yfirvinnubann ef ekki komi betra tilboð um kaup og kjör frá samninganefndrRíkisins.

Þátttaka í kosningu félagsmanna FÍH var mjög góð, 63,64% tóku þátt og af þeim sögðu 94,6% já við yfirvinnubanni frá og með 10. júlí næstkomandi en einungis 5,4% voru mótfallnir.

Skýr skilaboð 

 „Þetta eru mjög skýr skilaboð til bæði til stjórnar og samninganefndar og til stjórnvalda um að hjúkrunarfræðingum er full alvara og samstaða í hópnum um að nú viljum við sjá betri samninga en boðið hefur verið upp á til þessa," sagði Elsa Friðfinnsdóttir formaður FÍH.

Ef til yfirvinnubanns kæmi þarf að boða til þess eigi síðar en 25. júní sem er nú á miðvikudaginn en þann dag er boðaður fundur fulltrúa FÍH með samninganefnd ríkisins hjá ríkissáttasemjara.

„Við munum mæta til þessa fundar með þessi skýru skilaboð frá hjúkrunarfræðingum og kröfu um betra tilboð heldur en lagt hefur verið fram," sagði Elsa í samtali við Fréttavef Morgunblaðsins fyrir skömmu.

• 2 blogg um fréttina

Bloggað um fréttina

• Guðrún Jóna Gunnarsdóttir: Góð samstaða
• Björgvin Guðmundsson: Mikill meirihluti hjúkrunarfræðinga vill yfirvinnubann