Eigandi hvolpsins yfirheyrður

Eigandi hvolpsins sem urðaður var lifandi í hrauninu í Kúagerði og skilinn þar eftir til að drepast var yfirheyrður af lögreglunni á Suðurnesjum í gær. Hafði eigandi hundsins sjálfur samband við lögregluna og sagðist nýlega hafa eignast hundinn, sem er fjögurra mánaða tík af doberman-kyni, en að hann hefði sloppið frá sér.

Hundurinn fannst illa leikinn en hann hafði legið tímunum saman undir nokkrum 20 kílóa þungum steinum í hrauninu. Að sögn Helga Sigurðssonar, dýralæknis á Dýraspítalanum í Víðidal, þar sem hundurinn dvelst núna, er hundurinn að braggast en hann þjáist ennþá af dálitlum lömunareinkennum.

Ekki liggur fyrir hvort eigandi hundsins hafi stöðu grunaðs manns við rannsókn málsins.