Hraunið hreyfist

Hluti af gamalli skriðu í Kálfanesfjalli sem í daglegu tali er kölluð Hraunið hefur færst úr á árinu. Svæðið er á útivistarsvæði Hólmvíkinga og malarnám er í hluta hennar.

Hafdís Sturlaugsdóttir, landnýtingarfræðingar á Náttúrustofu Vestfjarða, sagðist hafa tekið eftir brotsári í skriðunni í síðustu viku. Hafi það verið svart eftir rigningar og því skorið sig úr mosa- og fléttuvaxinni skriðunni.

„Þetta er eldra berghlaup og þarna hefur fallið skriða og nú hefur hluti af henni farið af stað aftur í heilu lagi,“ segir Hafdís. Hún segist ekki vita hvenær þetta hafi gerst en líklega sé það seint í vetur eða snemma í vor.

Hafdís segir skriðuna hafi farið yfir gróið land en engin mannvirki séu í hættu. Skriðan sem fór af stað er um tuttugu metrar á breidd efst, í kringum fimm hundruð metra löng og á að giska tvær mannhæðir þar sem hún endar.

„Ef hún fer af stað aftur myndi það gerast mjög hægt því hallinn er ekki mikill á því svæði sem hún er núna,“ segir Hafdís. Hún segir ómögulegt að segja til um hvort jarðskjálfinn í júní hafi hleypt skriðunni af stað en skjálftinn hafi að minnsta kosti fundist á Hólmavík.

Matthías Lýðsson, eiginmaður Hafdísar, stendur við brún skriðunnar. Hafdís Sturlaugsdóttir

• 1 blogg um fréttina

Bloggað um fréttina

• Snorri Bergz: Hraunið hreyfist