Hyggst skila gögnunum eftir helgi

Guðmundur Þóroddsson, fyrrverandi forstjóri Orkuveitu Reykjavíkur, hyggst skila eftir helgi gögnum, sem hann fjarlægði af skrifstofum OR skömmu áður en hann lét af störfum sem forstjóri í lok maí.

Samkvæmt upplýsingum Morgunblaðsins er hér um að ræða gögn sem tengjast stjórnarfundum OR tíu ár aftur í tímann. Þar á meðal eru viðskiptasamningar og trúnaðarupplýsingar, sem fyrirtækið telur brýnt að leynd hvíli yfir. Sömuleiðis er um að ræða fundargerðir frá sama tímabili.

Heimildir Morgunblaðsins herma að hvarf gagnanna, sem voru í mörgum kössum í skjalasafni Orkuveitunnar, hafi uppgötvast í byrjun júnímánaðar, þegar nálgast átti ákveðin gögn. Síðan hafi verið reynt að fá Guðmund til að skila gögnunum.

Taldi gögnin persónuleg skjöl

Guðmundur sagði í gærkvöld, þegar Morgunblaðið náði tali af honum: „Ég tók engin skjöl úr skjalasafni Orkuveitunnar. Þetta voru möppur sem ég geymdi á skrifstofu minni og í voru fundargögn sem ég hafði sem forstjóri fengið afhent á stjórnarfundum Orkuveitunnar. Ég leit á þessi gögn sem mín persónulegu skjöl.“

Skil ekki moldviðrið

Það er ekki rétt að reynt hafi verið að fá þessi gögn frá mér í meira en mánuð. Það hafa átt sér stað tvö samtöl um gögnin og ég hef aldrei neitað að afhenda þau. Síðast í dag fékk ég bréf frá lögfræðingi fyrirtækisins og ég mun skila þessum gögnum eftir helgi, þegar ég er aftur kominn í bæinn.“