Látnir ekki sýningargripir

„Látinn maður á að njóta sömu virðingar og hann gerir meðan hann er á lífi. Þar af leiðandi getur látinn maður aldrei verið sýningargripur,“ segir Kristján Valur Ingólfsson hjá Biskupsstofu. Í Morgunblaðinu í gær var fjallað um ungmenni í sumarvinnu í kirkjugörðunum sem fengu að skoða lík í skoðunarferð um líkhús í Fossvogi. Var nokkrum unglinganna brugðið, enda ekki undir það búnir að sjá látna manneskju berum augum.

Ekkert ákvæði er um að virða skuli hinn látna í lögum um kirkjugarða, greftrun og líkbrennslu. Þar er kafli um tilfærslu líks og flutning þess, en hvergi áréttað nákvæmlega hvernig skuli meðhöndla líkið á undirbúningsstigi greftrunar, til dæmis í líkhúsi. Í reglugerð um flutning líka er ekki minnst á lík í líkhúsi.

Í almennum hegningarlögum er röskun grafarhelgi og ósæmileg meðferð á líki gerð refsiverð, en það fellur tæpast undir það tilvik sem hér um ræðir. Hvergi í lögum er beinlínis bannað að fara með fólk inn í líkhús í þeim tilgangi að sýna þeim lík. „Það er alveg ljóst að þetta er ekki lögbrot,“ segir Kristján um skoðunarferð ungmennanna.

Fólk sem á ekkert erindi í líkhús

„Þarna er verið að fara með fólk sem á ekkert erindi inn í líkhús í þeim tilgangi að sýna þeim lík [þegar ungmennin skoðuðu lík]. Þegar prestsefni eru þjálfuð fara slíkir nemar í líkhús og það er hluti af þeirra námi. Að mínu viti ætti það ekki að vera leyfilegt að fara með hóp inn í líkhús í þeim tilgangi að sýna látið fólk. Í slíkum tilfellum er verið að sýna persónur og þessar persónur njóta friðhelgi, rétt eins og venjulegt fólk,“ segir Kristján.