Stórlaxasumar í Hofsá

„Að fá svona marga á örstuttum tíma er nokkuð merkilegt og þessir bera af í stærð," segir Edda Helgason, hjá Stangveiðifélaginu Hofsá, en á þriggja vikna tímabili hafa fjórir stórlaxar að stærð 97-110 cm veiðst í ánni.  Edda veiddi sjálf þann fyrsta 27. júní sem var 97 cm, og veiddist 110 cm laxinn þann 15. júlí.  Þá hefur þónokkuð af löxum yfir 80 cm veiðst í sumar.

Hofsá er þekkt fyrir stórlaxa og á hverju ári veiðast nokkrir laxar yfir 20 pund eða 10 kíló.  Að sögn Eddu hefur mikið sést af stórlöxum í sumar og segir hún fjörið í veiðinni snúast um orrustuna að ná laxinum inn.  „Menn eru búnir að missa nokkra stóra fiska, í nokkrum tilfellum hefur girnið slitnað," segir Edda og bætir við að laxinn hafi góða möguleika að komast af sérstaklega ef veitt er á litla flugu.

Stangveiðifélagið Hofsá hefur frá því 2002 unnið verkefni í samstarfi við Veiðimálastofnun þar sem sumum löxum sem hefur verið sleppt er komið fyrir í súrefniskassa og þeir fluttir upp fyrir foss á hrygningarsvæði.  Að sögn Eddu hefur verkefnið reynst vel og hafa 40-110 laxar verið fluttir á ári hverju. „Svæðið er friðað og þar er mikið af fæði fyrir laxana, sem þar hrygna þegar haustar," segir Edda. 

Helgi Þórðarson veiddi 97 cm hryggnu þann 7. júlí 2008 hjá Nesbreiðu í Hofsá. Stangveiðifélagið Hofsá

• 2 blogg um fréttina

Bloggað um fréttina

• Gísli Foster Hjartarson: Ha ha ha
• Níels A. Ársælsson.: Ár makrílsins á Vestfjörðum