Bauð málverk til sölu

Lögreglan á Vestfjörðum handtók í síðustu viku egypskan farandsölumann á Ísafirði sem hafði verið á ferð í byggðarlögum á norðanverðum Vestfjörðum og líklega víðar um land.  Maðurinn hafði gengið í hús og boðið til sölu olíumálverk og annan varning. 

Að sögn lögreglunnar á Vestfjörðum hefur maðurinn  hvorki dvalar- né atvinnuleyfi hérlendis.  Hann er grunaður um að hafa flutt varninginn ólöglega til landsins og skorti hann jafnframt nauðsynleg leyfi til sölumennskunnar.  Talið er að atferli mannsins sé m.a. brot á tollalögum, lögum um atvinnuréttindi útlendinga, lögum um verslunaratvinnu og lögreglusamþykkt Ísafjarðarbæjar.

Maðurinn gisti fangageymslur á Ísafirði á meðan mál hans var rannsakað og s.l. miðvikudag ákvarðaði Héraðsdómur Vestfjarða að maðurinn skyldi vera í farbanni til 21. júlí samkvæmt beiðni lögreglustjórans á Vestfjörðum. 

Lagt hefur verið hald á 905 myndir og muni sem tilheyra manninum auk nokkurs af fjármunum.  Rannsókn málsins er lokið og hefur lögreglustjóri þegar gefið  út ákæru á hendur manninum, sem er frjáls ferða sinna.

• 1 blogg um fréttina

Bloggað um fréttina

• Jenný Anna Baldursdóttir: Laangdreginn aulahrollur