50 gönguhrólfar á Hengilssvæðinu

Um 50 manns tóku þátt í fræðslugöngu um Hellisheiðarsvæðið í gærkvöldi. Gengið var frá Hellisheiðarvirkjun og komið við á Kolviðarhóli og hugað þar að sögu, gróðri og fleiru.

Fram kemur á vef Orkuveitu Reykjavíkur að gengið var upp Hellisskarð og skoðaðar leifar af gamla veginum efst í brekkunni. Frá skiljustöðinni var síðan gengið á Gígahnjúkinn og hugað að jarðfræði og endurgerð gíganna sem unnið hefur verið að í sumar. Að lokum var gengið að borholunum við Reykjarfell en þar er nú ein öflug hola í blæstri.

Gangan í gærkvöldi var tíunda fræðsluganga Orkuveitunnar í sumar og skipta þátttakendur orðið hundruðum. Fjórar göngur eru framundan og má nálgast upplýsingar um þær á heimasíðu Orkuveitu Reykjavíkur.

• 1 blogg um fréttina

Bloggað um fréttina

• Eiður Svanberg Guðnason: "..leifar af gamla veginum".