Ómar Ragnarsson verðlaunaður
Setja bókamerki
Ómar Ragnarsson, kvikmyndagerðarmaður og fyrrverandi fréttamaður hjá Ríkissjónvarpinu hlýtur Seacology umhverfisverndarverðlaunin árið 2008 fyrir baráttu sína gegn eyðileggingu á náttúru á hálendi Íslands.
Fram kemur í tilkynningu frá Seacology að Ómar hljóti verðlaunin fyrir að hafa vakið almenning til vitundar um risavaxnar virkjanaframkvæmdir á hálendi Íslands og þau umhverfisspjöll sem stíflugerð og uppistöðulón til að knýja álver Alcoa á Reyðarfirði hafi valdið.
Þar kemur jafnframt fram að efnahagslegur ávinningur Íslands af þessum framkvæmdum sé lítill en gríðarstór svæði ósnortinnar náttúru hafi verið eyðilögð. Því sé Ómar Ragnarsson hetja í umhverfismálum á Íslandi.
Seacology umhverfisverndarverðlaunin hafa verið veitt árlega síðan 1992 til einstaklinga sem þykja hafa lagt mikið af mörkum til verndar lífríki á eyjum um allan heim s.s. Indónesíu, Hawaii, Tonga, Sri Lanka, Madagascar, Borneó og Papúa Nýju Gíneu. Er þetta í fyrsta sinn sem verðlaunin eru veitt vegna umhverfisverndarstarfs í Evrópu.
Seacology eru helstu umhverfisverndarsamtök heims sem hafa það að markmiði að vernda einstakan fjölbreytileika lífríkis á eyjum veraldar. Samtökin voru stofnuð í ljósi þess að meirihluti þeirra plöntu- og dýrategunda sem orðið hafa útdauðar síðustu fjögurhundruð árin lifðu á eyjum heimsins og vinna samtökin ötullega að því að sporna gegn þessari ógnvekjandi þróun, að því er fram kemur í tilkynningu.
Ómar Ragnarsson mun veita verðlaununum formlega viðtöku í San Francisco í Bandaríkjunum 2. október næstkomandi.
Úlfar: Heppileg tímasetning á gosinu
Heitt vatn fannst sem gæti annað 10 þúsund manns
Beint: Eldgos hafið við Stóra-Skógfell
Átti ekki að láta pirring bitna á sjúklingi
Hvað gerðist eiginlega í VMA?
Einar skorar á næstu ríkisstjórn
Spara stórfé með olíukaupum ytra