Til í slaginn saman

Vilhjálmur Egilsson, framkvæmdastjóri Samtaka atvinnulífsins, og Ögmundur Jónasson, formaður BSRB, taka vel í hugmynd Gylfa Arnbjörnssonar, framkvæmdastjóra Alþýðusambands Íslands, um að forystumenn vinnumarkaðarins vinni saman að því að huga að lausnum efnahagsvandans.

Gylfi segir að góð samskipti vinnumarkaðarins og stjórnvalda skapi Íslendingum betri tækifæri til að taka á svona vanda en þegnum flestra ríkja heims. „Við áttum okkur ekki á því hvaða auðlind felst í nálægðinni á Íslandi,“ segir hann.

Peningamálastefna að þrotum komin

Framkvæmdastjóri ASÍ segir að mikil mótsögn og pattstaða ríki í peningamálastefnunni og mjög flókið og erfitt sé að vinna úr henni. Hún sé að þrotum komin og sé orsakavaldur óstöðugleikans á Íslandi. Lausn vandans felist ekki í því að ríkið taki stórt lán til að styrkja gjaldeyrisforðann, 200 til 2.500 milljarða, og það sé ekki vænlegt til árangurs að gera skattgreiðendur ábyrga fyrir 500 milljarða króna láni. Umræðan snúist um hvernig koma megi bönkunum til bjargar, þegar þeir skili metafkomu, í stað þess að snúast um fólkið og fyrirtækin.

Ingibjörg Sólrún Gísladóttir, utanríkisráðherra, segir rétt að frumkvæðið að þjóðarsátt komi frá aðilum vinnumarkaðarins þar sem forsendur kjarasamninga séu að bresta. Þeir komi þó ekki til endurskoðunar fyrr en í febrúar en hugsanlegt sé að stjórnvöld komi þar að fyrir þann tíma.