Innlent | mbl | 14.8.2008 | 11:21

Keppt í hrútaþukli

Hrútaþukl er þjóðleg íþróttagrein.

Meistaramótið í hrútaþukli fer fram í Sauðfjársetrinu á Ströndum á sunnudag. Sauðfjársetrið stóð fyrst fyrir keppni í þessari þjóðlegu íþrótt árið 2003 og hefur aðsókn hefur stöðugt aukist að mótinu. Að vanda verður keppt í tveimur flokkum, flokki reyndra hrútaþuklara og þeirra sem óvanir eru að leggja mat á hrúta.

Á vefnum strandir.is segir: „Hrútadómarnir sjálfir fara þannig fram að Jón Viðar Jónmundsson ráðunautur fer fyrir dómnefnd sem metur fjóra íturvaxna hrúta með nútíma tækjum og tólum og raðar þeim í gæðaröð fyrirfram. Síðan reyna keppendur sig við matið á hrútunum með hendur og hyggjuvit að vopni og reyna að komast að sömu niðurstöðu og dómararnir. Þeir óvönu láta duga að raða hrútunum í sæti frá eitt til fjögur og færa rök fyrir máli sínu. Þeir vönu gefa hins vegar hrútunum stig fyrir einstaka þætti eins og t.d. bakbreidd, útlit og samræmi og fara þá eftir stigakerfi sem bændur gjörþekkja.“

Veglegir vinningar eru í boði fyrir sigurvegara í báðum flokkum og sigurvegari vana flokksins mun auk verðlauna fá afhentan farandgripinn „Horft til himins“ sem er tileinkaður minningu Brynjólfs Sæmundssonar ráðunautar á Hólmavík.

Strandir.is