Búa í húsbíl og langar á Vog

„Það væsir í sjálfu sér ekkert um okkur hérna,“ segir heimilislaus maður sem býr ásamt félaga sínum í húsbíl á höfuðborgarsvæðinu. „En það getur orðið frekar kalt á nóttunni, enda hitarinn bilaður. Það versta er samt hvað maður er niðurbrotinn andlega.“

Báðir bíða mennirnir þess að komast í meðferð á Vogi, en þeir segjast vera brennivínskarlar af gamla skólanum. „Þórarinn [Tyrfingsson] kallar okkur steingervinga; það eru svo fáir eftir sem eru bara í brennivíninu.“

Annar mannanna hafði búið í bíl þar til félagi hans bauð honum að búa með sér í húsbílnum fyrir tæpri viku. „Það var sannkölluð himnasending, enda frekar erfitt að sofa í bílnum með allt dótið.“

Edrú samfleytt í níu ár

Báðir mennirnir segjast hafa háð áratugalanga baráttu við Bakkus. „Á síðustu 30 árum hef ég örugglega samanlagt verið edrú í 18 ár, lengst í 9 ár í einu,“ segir annar.

Hinn segist hafa verið allsgáður í heilt ár þar til nýverið.

Á bindindistímabilinu hafi hann verið atvinnulaus og stundað AA-fundi tvisvar til þrisvar á dag. „Það var bara það sem þurfti til að koma mér í gegnum daginn.“ Það var svo þegar hann réð sig í vinnu sem krafðist að jafnaði 16 tíma vinnu af honum á sólarhring, auk þess sem yfirmaðurinn skyldaði hann oft til að vinna í fríum sínum, sem aftur fór að halla undan fæti. Sá bíður eftir svari frá Vogi, en hinn hefur þegar fengið að vita að hann muni komast inn um helgina.