Ólafur F. Magnússon: Stöðvaði brottrekstur

„Ég bjargaði því að frábær embættismaður borgarinnar yrði látinn fara fyrir það eitt að vera samviskusamur og reyna að leiðbeina ungum og óreyndum borgarfulltrúa Sjálfstæðisflokksins,“ segir Ólafur F. Magnússon, fráfarandi borgarstjóri. „Þorbjörg Helga Vigfúsdóttir efndi sem formaður leikskólaráðs til mjög dýrrar auglýsingaherferðar út af „Borgarbörnum“. Hún hafði ekkert samráð við mig eða æðstu stjórn borgarinnar um það og lítið samráð við sviðsstjórann, Ragnhildi Bjarnadóttur. Þegar sviðsstjórinn gerði athugasemdir vildi Þorbjörg Helga láta reka sviðsstjórann sem átti allt annað skilið enda einn af traustustu og bestu starfsmönnum borgarinnar “ segir Ólafur F.

Hrein ósannindi

Þorbjörg Helga segir ummæli Ólafs F. vera hrein ósannindi. „Þetta er algjörlega með ólíkindum að maðurinn skuli haga sér svona,“ segir hún. „Það er rosalega ósanngjarnt af honum að draga sviðsstjórann inn í þennan pólitíska leik.“