Gæsahópur réðist á örn

Þegar Óskar Steingrímsson á Reykhólum var á ferð við Gilsfjörð nýlega sá hann haförn sveimandi virðulega í góðum friði hátt í lofti. Hugðist Óskar ná myndum af konungi fuglanna í öllu sínu veldi. En veldið og friðurinn stóðu ekki lengi því að gæsahópur kom á hröðu oddaflugi og veittist að erninum sem fataðist heldur virðuleikinn við þessa óvæntu árás. Gæsirnar gerðu þrjár atlögur áður en þær hurfu jafnskyndilega og þær birtust.

Að sögn Signýjar M. Jónsdóttur á Gróustöðum við Gilsfjörð, þar sem ernir eru á sveimi á hverjum degi, er ekki óvanalegt að sjá ýmsar fuglategundir veitast að erninum, allt niður í hrossagauka og aðra smáfugla. Hins vegar er það líklega fátítt eða a.m.k. fáséð að gæsahópur geri skipulega atlögu að haferni rétt eins og þar væri fylking orrustuflugvéla á ferð.

Sjá meira á Reykhólavefnum.

• 3 blogg um fréttina

Bloggað um fréttina

• Sigríður Sigurðardóttir: Örn í gassagangi..... og fálkasaga.
• Magnús Vignir Árnason: Fékk hann ekki gæsahúð?
• Heimir Lárusson Fjeldsted: Örn steggjaður.