Harma úrskurð umhverfisráðherra

Byggðarráð Norðurþings harmar úrskurð umhverfisráðherra um að fram  fari sameiginlegt mat á umhverfisáhrifum fjögurra framkvæmda vegna  álvers á Bakka. Segir í ályktun ráðsins, að þessi úrskurður sé þvert á niðurstöðu  Skipulagsstofnunar og gegn vilja sveitarfélagsins.

„Það alvarlega við úrskurð  ráðherra er að ekkert samráð var haft við heimamenn þ.e. hvorki var  leitað upplýsinga eða gagna til að styrkja úrskurðinn. Ljóst er að ef  ekki verður fundin lausn á næstu vikum mun úrskurðurinn leiða til  frestunar á framkvæmdum vegna álvers á Bakka um það minnsta ár. Slíkt  mun hafa mikil neikvæð áhrif á rekstrar- og fjárhagsstöðu  sveitarfélagsins Norðurþings," segir í ályktun ráðsins.

Það segist vona, að farsæl lausn muni finnast í  þessu mikilvæga máli á næstu dögum. Taka þurfi af öll tvímæli um að  hægt verði að halda áfram rannsóknarborunum á Þeistareykjum og í  Kröflu næsta sumar. Slíkt sé forsenda þess að hægt verði að  ljúka öllum nauðsynlegum samningum vegna fyrirhugaðar stóriðju á  haustdögum 2009.

• 1 blogg um fréttina

Bloggað um fréttina

• Magnús Helgi Björgvinsson: Var engin vinna í gangi þarna fyrir norðan?!