Festist í gaddavír

Karl á fertugsaldri var handtekinn í Háaleitishverfi í gærkvöldi en sá var með ýmsar tegundir af fíkniefnum í fórum sínum. Maðurinn reyndi að komast undan þegar lögreglan kom á vettvang og tók til fótanna en var hlaupinn uppi af fótfráum laganna vörðum.

Að sögn lögreglu tafði það för hins ólöghlýðna borgara þegar frekar hátt grindverk varð fyrir honum á flóttanum, en efst á því var gaddavír og festist maðurinn í honum þegar hann reyndi að klifra yfir.

Manninum var hjálpað niður af grindverkinu og síðan ekið á lögreglustöð þar sem hann var færður í fangageymslu.

Minniháttar skemmdir urðu á fatnaði flóttamannsins sem jafnframt hruflaðist lítillega á þessu brölti á gaddavírnum.

• 2 blogg um fréttina

Bloggað um fréttina

• Guðjón Sigþór Jensson: Oft kemur gaddavír að gagni
• Sigríður Sigurðardóttir: Víraður gaur.....