Öllum kennurum í tölvunarfræði hjá HA sagt upp

Háskólaráð Háskólans á Akureyri samþykkti á fundi sínum í gær að ekki verði innritaðir nemendur á fyrsta ár  í tölvunarfræði veturinn 2008-2009. Einungis fjórir nemendur sóttu um námið að þessu sinni og hefur endurskoðun á skipulagi námsins fyrir þremur árum ekki skilað þeim árangri sem vonast var eftir, samkvæmt tilkynningu frá Háskólanum á Akureyri.
 
Háskólaráð samþykkti einnig að nú þegar verði hafið endurmat á skipulagi og forsendum námsins. Vegna þessa verður að endurskoða starfsmannamál í tölvunarfræði í heild, þar sem framtíð núverandi náms er óviss og ekki er þörf fyrir alla kennara í tölvunarfræði til að ljúka kennslu nemenda næstu tvo vetur.
 
Einhverjir kennarar endurráðnir

Í dag var öllum kennurum í tölvunarfræði sagt upp störfum en þeir eru sex talsins. Hluta starfsmanna verður gefin kostur á endurráðningu til að ljúka kennslu núverandi nemenda. Í framhaldinu verður unnið að því að breyta tilhögun námsins og bjóða upp á það í formi fjarnáms en það samræmist vel áætlun Háskólans á Akureyri um að efla fjarnám við stofnunina.
 
Þorsteinn Gunnarsson, rektor Háskólans á Akureyri, segist í tilkynningu harma  að til þessarar ákvörðunar hafi þurft að koma en Háskólinn hafi verið nauðbeygður til að grípa til þessara aðgerða vegna þess hve fáir nemendur stundi þetta nám.

• 2 blogg um fréttina

Bloggað um fréttina

• Stefán Örn Viðarsson: Sorglegt.. hefði getað farið öðruvísi
• Peter Parker: Gagnvart þeim fáu nemendum...