Innlent | mbl | 25.8.2008 | 14:20 | Uppfært 18:08

Fálkaorðan bætist í orðusafnið

Ólafur Stefánsson með silfurverðlaunin. mbl.is/Brynjar Gauti

Forseti Íslands, Ólafur Ragnar Grímsson sagðist ætla að sæma íslenska landsliðið í handbolta hinni íslensku fálkaorðu við fyrsta tækifæri. Að öllum líkindum verða þeir sæmdir fálkaorðunni á miðvikudaginn eftir athöfn á Arnarhóli.

Það verður reynt að koma þessari athöfn við á Bessastöðum við hentugleika án þess að það rekist á hátíðahöldin á miðvikudaginn og mun athöfnin að öllum líkindum fara fram eftir að leikmenn hafa verið hylltir af almenningi á Arnarhóli.

Meiningin er að sæma fjórtán leikmenn íslenska landsliðsins, þjálfara liðsins og formann handknattleikssambandsins fálkaorðunni við fyrsta tækifæri en þó að það sé óvenjulegt að slík orðuveiting fari fram á öðrum tíma en um áramót eða á 17. júní þá hefur það komið fyrir.

Ólafur Stefánsson, fyrirliði, Guðmundur Guðmundsson, þjálfari, og Guðmundur Ingvarsson, formaður Handknattleikssambandsins verða sæmdir stórriddarakrossi en aðrir leikmenn verða sæmdir riddarakrossi.