Gestalæti á Pollinum

Það er engu likara en andanefjurnar tvær séu sestar að á Akureyri. Þær svamla fram og aftur með Drottningarbrautinni daginn út og inn og þar eru stöðugt bílar við vegbrún, fólk að skoða og taka myndir - eða bíða eftir því að sjá hvar þeim skýtur næst upp.

Sverrir Páll Erlendsson, sem tók meðfylgjandi mynd síðdegis í dag, segir ennfremur:

Siglingaklúbbssvæði Nökkva við Höpfnersbryggju er vinsæll skoðunarstaður og þar var nú undir kvöld fjölmenni mikið, heil rúta af miðaldra erlendum gestum af skipi, sem er hér í dag, auk fólks í um það bil 30 einkabílum.

Og það voru gestalæti í þessum skemmtilegu sjávardýrum. Þau stukku og gáfu kost á mikilli myndatöku. Og magaskellurinn í lendingunni hefði ekki dugað til silfurverðlauna í dýfingakeppni á Ólympíuleikunum.

En þetta er ævintýri líkast, daglegar hvalaskoðunarferðir við Pollinn á Akureyri. Kannski verður líka stokkið á Akureyrarvökunni um helgina.

• 5 blogg um fréttina

Bloggað um fréttina

• Snorri Bergz: Nó bissness læk sjóbissness
• Gunnar Th. Gunnarsson: Í hvernig æti eru þær þarna?
• Haraldur Bjarnason: Akureyringar taka vel á móti gestum
• Edda Agnarsdóttir: Andanefjur leika listir sínar fyrir Leikhús Akureyrar
• Gulli litli: Madur var nú flengdur....