Þjónusta Stígamóta á Suðurlandi

Regluleg þjónusta Stígamóta hefst á Suðurlandi í september og hafa samtökin boðið til kynningarfunda á svæðinu. Þjónustan hefur til þessa fyrst og fremst nýst höfuðborgarsvæðinu. Nýverið hófst hún á Austurlandi.

Vefur Hafnar í Hornafirði skýrir frá því að starfsfólk Stígamóta muni kynna tilraunaverkefnið á Höfn í Hornafirði, í Vestmannaeyjum og í Árborg dagana 1.-4. september.

Haldnir verða lokaðir fundir með fagfólki á hverjum stað, framhaldsskólar verða heimsóttir og boðið verður upp á opna kynningarfundi, ásamt kynningum í fjölmiðlum.

Starfið mun fara þannig fram að Sunnlendingar sem beitt hafa verið kynferðisofbeldi geta hringt til Stígamóta í síma 5626868 og pantað tíma og fá þá að vita hvar og hvenær þeim bjóðast viðtöl.

Stígamót bjóða upp á ókeypis viðtalsþjónustu og sjálfshjálparstarf fyrir konur og karla sem beitt hafa verið hvers kyns kynferðisofbeldi. 

• 1 blogg um fréttina

Bloggað um fréttina

• Dísa Dóra: Frábært framtak