Hækkun á gjaldskrá mötuneyta

Gjaldskrá skólamötuneyta á Akureyri hækkar um 3,65%. Sífellt fleiri nýta sér mötuneytin. Yngstu nemendurnir nýta sér þjónustuna mest en elstu minnst. Milli 70 og 80 prósent nemenda borða í skólamötuneyti.

Vikudagur skýrir frá því að meirihluti skólanefndar Akureyrar hafi samþykkt á fundi sínum nýlega tillögu um að gjaldskrá skólamötuneyta hækki um 3,65%. Verð fyrir máltíð í annaráskrift hækkar þannig um 10 krónur og verður 284 krónur og verð fyrir stakar máltíðir hækkar um 14 krónur og verður 384 krónur.

Gunnar Gíslason fræðslustjóri á Akureyri sagði þessi hækkun væri til komin vegna hækkunar á vöruverði.

„Það er verið að reyna að halda þessari hækkun í lágmarki en við eigum að reka mötuneytin á núlli. Við það er verið að rembast en það er ekki einfalt mál.“

Gunnar sagði að nýtingin í mötuneytum grunnskólanna hafi verið að aukast mjög mikið.

„Við höfum verið að sjá 70-80% nýtingu og þá á ég við það að þetta hlutfall nemenda hefur verið kaupa sér máltíð á hverjum degi.“

Gunnar sagði nýtingarhlutfallið mjög mismunandi, það væri lang mest hjá yngstu krökkunum en að það hafi aftur reynst erfitt að fá unglingana til að nýta sér mötuneyti skólanna.