Ekki kvennaleiðrétting, heldur barátta fyrir mati menntunar

Heildarlaun ljósmæðra eru litlu hærri en heildarlaun hjúkrunarfræðinga þrátt fyrir að ljósmæður hafi að baki tveggja ára meistaranám sem þær síðarnefndu hafa ekki. Nemur munurinn aðeins rétt rúmum tveimur prósentum og því ekki að undra að ljósmæður óttist að dragi úr nýliðun í stéttinni. Á næstu tíu árum verður tæpur helmingur þeirra ljósmæðra sem nú eru að störfum farinn á eftirlaun.

Ljósmæður krefjast 25% launaleiðréttingar til samræmis við stéttir í þjónustu ríkisins með sambærilega menntun. Það segja þær réttmæta kröfu í ljósi menntunar og ábyrgðar í starfi.

Mat menntunar grundvallarmál

Í tengslum við kjarabaráttu ljósmæðra hefur verið bent á þá klausu í stjórnarsáttmála ríkisstjórnarinnar að endurmeta beri sérstaklega „kjör kvenna hjá hinu opinbera, einkum þeirra stétta þar sem konur eru í miklum meirihluta“. Að mati Guðlaugar Kristjánsdóttur, formanns BHM, þarf að gæta þess að blanda ekki umræðunni um að jafna kjör kynjanna of mikið í baráttuna fyrir launum í samræmi við menntun. Kynbundinn launamunur hafi þó eflaust eitthvað að segja um lág laun stéttarinnar.

BHM hefur sent út stuðningsyfirlýsingu við ljósmæður og segir Guðlaug það mikið grundvallarmál í allri baráttu BHM að fá menntun metna til launa. Guðlaug vill ekki leggja mat á hvort nauðsynlegt hafi verið að efna til verkfalls en hún segist halda að e.k. þrýstingur eða aðgerðir hafi verið eina vopnið sem stéttarfélagið átti í þessari kjarabaráttu.