Hætta vegna launa og álags

Algengasta ástæðan fyrir því að lögreglumanna sóttu um leyfi eða létu af störfum á árunum 2002-2007 var léleg laun. Í símakönnun sögðu 18,7% þeirra sem svöruðu að launin væri ástæðan fyrir því að þeir óskuðu eftir leyfi eða sögðu upp störfum og 16% nefndu álag í starfi. 4% svaranda sögðu að ástæðan væri einelti/kynferðisleg áreitni. Þetta kemur fram í nýrri ársskýrslu ríkislögreglustjóra.

Könnun var framkvæmd af embætti ríkislögreglustjóra í samvinnu við Miðlun ehf. í apríl sl.

Á tímabilinu fengu 202 lögreglumenn leyfi eða lausn frá starfi, þar af 130 af eigin ósk og uppfylltu þeir þar með kröfur könnunarinnar. Karlar voru 107 í þessum hópi og konur 23. Könnunin var gerð í apríl 2008 og náðist samband við 86 þátttakendur (66,1%) og 75 þeirra svöruðu.

Eins og fyrr segir var laun algengasta ástæðan (18,7%). Vinnutími/vinnuálag/þreyta var næst algengasta ástæðan (16%). 11% sögðust vilja breyta til, 8% nefndu samskipti við yfirmenn og jafnhátt hlutfall svarenda nefndi sameiningu lögregluembættanna. 5% svarenda fékk eða vildi annað starf og jafnhátt hlutfall fór eða langaði í nám. 4% nefndu einelti/kynferðislega áreitni og jafnmargir óánægju með yfirstjórn. Fimmtungur nefndi annað, s.s. búferlaflutninga, veikindi, nám sambýlisfólks, starfsþróun væri ekki nægjanleg eða sveigjanleiki of lítill.

• 2 blogg um fréttina

Bloggað um fréttina

• Jakob Falur Kristinsson: Lögreglumenn
• Guðrún María Óskarsdóttir.: Laun og álag opinberra starfsmanna, er sitjandi stjórnvöldum skömm í …