Sveitarfélögum boðið að kaupa nemakort hjá Strætó

Sveitarfélög sem standa utan byggðarsamlagsins Strætó bs. geta nú í fyrsta skipti sótt um að kaupa nemakort fyrir þá íbúa sína sem stunda viðurkennt nám á framhalds- eða háskólastigi á höfuðborgarsvæðinu. Tillaga þessa efnis var samþykkt á síðasta stjórnarfundi Strætó bs. Hvert nemakort kostar 31.000 krónur og gildir til 1. júní 2009.

Vilji sveitarfélög kaupa nemakort í strætó fyrir námsmenn sína óska þau skriflega eftir því við Strætó bs. Við móttöku erindisins opnast sá möguleiki að íbúar viðkomandi sveitarfélags sem eru nemendur í viðurkenndu námi á framhalds- eða háskólastigi á höfuðborgarsvæðinu geti sótt um nemakort á vefsvæðinu Strætó.is. Hingað til hefur skilyrði fyrir umsókn um nemakort verið að viðkomandi nemandi sé með lögheimili í sveitarfélagi sem á í samstarfi um nemakortin, þ.e. Reykjavík, Kópavogi, Hafnarfirði, Garðabæ, Seltjarnarnesi, Mosfellsbæ eða Álftanesi, að því er segir í tilkynningu.

Rekstrarkostnaður Strætó þrír milljarðar króna á ári

Kostnaður við rekstur strætisvagnakerfis höfuðborgarsvæðisins er ríflega 3.000 milljónir króna á ári, eða sem nemur rúmlega 15 þúsund krónum á hvern íbúa á svæðinu. Reglulega nýta rúmlega 30 þúsund einstaklingar þjónustu Strætó bs. og miðað við núverandi rekstrarkostnað nemur því kostnaður á hvern einstakling sem notar strætó reglulega um 100 þúsund krónum á ári. Með því að veita námsmönnum sem búsettir eru utan sveitarfélaganna sem reka Strætó bs. aðgang að nemakortakerfinu eru sveitarfélögin á höfuðborgarsvæðinu því að niðurgreiða raunkostnað við notkun hvers nemanda um nær 70%.

„Nemakortin hafa notið vinsælda og því er afar jákvætt að geta nú boðið öðrum sveitarfélögum að taka þátt með þessum hætti. Um leið viljum við leggja áherslu á að þetta verkefni er kostnaðarsamt fyrir sveitarfélögin á höfuðborgarsvæðinu, sem greiða þessa upphæð, 31.000 krónur, fyrir hvern nemanda sveitarfélagsins sem sækir um nemakort auk þess að niðurgreiða rekstur Strætó bs. almennt. Því er eðlilegt að sveitarfélög sem vilja bjóða nemendum aðgang að nemakortinu taki þátt í að greiða hluta kostnaðarins með þessum hætti,“ segir Reynir Jónsson, framkvæmdastjóri Strætó bs, í tilkynningu.

• 2 blogg um fréttina

Bloggað um fréttina

• Jón Ingi Cæsarsson: Á Akureyri fá allir frítt... líka íbúar frá höfðuborgarsvæðinu.
• Heimir Lárusson Fjeldsted: Akureyringar greiði fyrir sína nemendur í Reykjavík