Heita vatnið hækkar um 9,7%

Iðnaðarráðherra hefur staðfest samþykkt stjórnar Orkuveitu Reykjavíkur um hækkun á heitavatnsgjaldi. Gjaldskráin hækkar um 9,7% og mega íbúar á veitusvæði OR reikna með að hitareikningur meðalíbúðarinnar hækki um 300 krónur á mánuði frá 1. október. Hækkun kostnaðar og fjárfesting í nýrri hitaveitu frá Hellisheiði eru ástæður hækkunarinnar.

Stjórn Orkuveitu Reykjavíkur ákvað á fundi sínum á föstudag að hækka verðið á hverjum rúmmetra af heitu vatni úr 65,23 kr. í 71,56 kr. án virðisaukaskatts. Iðnaðarráðuneytið hefur nú staðfest breytinguna, segir í tilkynningu frá OR.

Þar segir jafnframt að gjaldskrárbreytingin sé sú fyrsta frá því Orkuveita Reykjavíkur lækkaði verð á heitu vatni 2005. Á síðustu 10 árum hefur vægi húshitunar í vísitölu neysluverðs lækkað úr 2,5% árið 1995 í 1,0% árið 2008. Að teknu tilliti til þess og að Orkuveita Reykjavíkur þjónar um tveimur þriðju landsmanna eru áhrif þessarar 9,7% gjaldskrárbreytingar á hækkun neysluvísitölu 0,07%.

Meðalíbúðin á höfuðborgarsvæðinu er um 110 fermetrar að stærð. Miðað við algenga notkun í slíku húsnæði nemur hækkunin um 300 krónum á mánuði.

• 4 blogg um fréttina

Bloggað um fréttina

• Guðmundur Zebitz: Stærri flugeldasýning næst?
• Örvar Már Marteinsson: Óskynsamleg hækkun
• Reynir W Lord: Djöfull verður gaman þegar við byrjum að semja um hækkun …
• Haraldur Haraldsson: Heita vatnið hækkar um 9,7% ???????