Frystikistur eru svalar

Svo virðist sem margir fylgi nú því sparnaðarráði að kaupa matvæli á tilboðsverði og frysta því samkvæmt upplýsingum frá þremur stórum verslunum er sala á frystikistum og frystiskápum mun meiri nú en á sama tíma í fyrra.

Gestur Hjaltason, framkvæmdastjóri Elko, telur að aukningin hjá Elko nemi um 10-15% og því sé ekki hægt að tala um faraldur í þessu samhengi. Þetta sé engu að síður veruleg breyting, ekki síst í ljósi þess að sala á dýrum raftækjum hafi dregist verulega saman, jafnvel um allt að 30%.

Samdráttar gætir þó ekki í sölu á hvers kyns afþreyingarefni, dvd-diskum, tölvuleikjum og tilheyrandi tækjabúnaði, að sögn Gests. „Afþreyingin selst sem aldrei fyrr,“ segir hann. Verð á þessum vörum hafi farið lækkandi og ódýrar sé að horfa á bíómynd í sófanum en í kvikmyndahúsi.