Varað við brennisteinsmengun

Samkvæmt upplýsingum frá Vatnamælingum er hlaup hafið í Skaftá   og gera má ráð fyrir að hlaupið verði í stærra lagi, að sögn Almannavarna.  

Nú vex hratt í ánni við Sveinstind og gera má ráð fyrir vatnavöxtum í byggð seinna í dag eða kvöld.  Fólki er ráðlagt  að vera ekki nálægt upptökum Skaftár vegna  brennisteinsmengunar.  Upptök Skaftár eru úr Skaftárjökli í Vatnajökli austan við Langasjó.   

Ef verulega vex í ánni er hætta á að vatn flæði yfir veginn við Hólaskjól rétt við Eldgjá á Nyrðra fjallabaki og ef til vill víðar.   Náið er fylgst með framgangi hlaupsins. 

„Það vex mjög hratt í ánni,“ sagði Víðir Reynisson, deildarstjóri almannavarnadeildar ríkislögreglustjóra, í samtali við mbl.is. „Fulltrúar Vatnamælinga fóru í flug til að kanna aðstæður en við höfum ekki fengið upplýsingar frá þeim ennþá.“ Hann bætti við að gert væri ráð fyrir því að vatnavextir hæfust í grennd við Kirkjubæjarklaustur í kvöld.

• 1 blogg um fréttina

Bloggað um fréttina

• Sigríður Gunnarsdóttir: Frábært...