Neyddi dreng til að fara í sturtu

Héraðsdómur Norðurlands eystra hefur sakfellt starfsmann íþróttamiðstöðvar fyrir brot á barnaverndarlögum fyrir að færa dreng nauðugan úr fötum og láta setja hann í sturtu í búningsklefa. Drengurinn hafði áður neitað að fara eftir húsreglum íþróttahússins um að fara í bað eftir íþróttaiðkun. Refsingu starfsmannsins var frestað.

Í ákæru var starfsmanninum gefið að sök að hafa gerst sekur um yfirgang og ruddalega framgöngu gagnvart drengnum. Hann var einnig ákærður fyrir að hafa sett drenginn nauðugan í kalda sturtu en orðið „kalt" var síðar fellt úr texta ákærunnar.

Fram kemur í dómnum, að starfsmaðurinn játaði sök fyrir dómi eftir að ákærunni var breytt. Í niðurstöðu dómsins segir, að maðurinn hafi farið með visst agavald yfir drengnum sem starfsmaður í íþróttamiðstöðinni en leggja verði til grundvallar eins og málið liggi fyrir að hann hafi beitt því valdi harkalegar í þessu tilviki en efni stóðu til.

• 2 blogg um fréttina

Bloggað um fréttina

• Jóhannes Ragnarsson: Tvöfalt heimsmet
• Bara Steini: Hættið þessu væli.