Innlent | mbl | 25.10.2008 | 19:58

Aðildarviðræður við ESB strax

Stjórn kjördæmisráðs Samfylkingarinnar í Norðvesturkjördæmi segir ljóst að forsendur fyrir stefnuyfirlýsingu ríkisstjórnarinnar frá 27. maí 2007 séu gjörbreyttar og sá tími, sem þá virtist vera til umþóttunar um aðildarviðræður við ESB sé liðinn. Þær viðræður þurfi stjórnvöld að hefja strax.

Stjórn kjördæmisráðsins krefst uppgjörs við efnahags- og peningamálastefnu undanfarinna áratuga. Í ályktuninni segir að stjórn Seðlabankans verði að víkja. Nú þurfi breytingar til batnaðar með ábyrgð, jöfnuð og velferð almennings að markmiði. Taumlaus frjálshyggja og markaðshyggja hafir dregið þjóðina í skuldafen og við því þurfi að bregðast.

Þá segir að Alþingi verði að láta vinna vandaða rannsókn á því hvað brást, hvaða lærdóm megi draga og hvernig nýtt regluverk fyrir fjármálalífið eigi að vera. Leita skuli til aðila og einstaklinga, sem eru óháðir tengslaneti íslensks atvinnulífs og stjórnmála. Rannsaka skuli lögmæti viðskipta og ákvarðana í aðdraganda hrunsins í bönkunum á síðustu mánuðum og sækja þá til saka sem kunni að vera sekir.

Loks segir að Ísland hafi leitað aðstoðar alþjóðasamfélagsins en það þurfi líka að gera róttækar breytingar á stjórn efnahagsmála, bæði á hinum pólitíska vettvangi og innan stjórnkerfisins, með uppstokkun embætta og stórefldu eftirliti í viðskiptalífinu. Stjórn Seðlabanka Íslands verði að víkja. Við endurmönnun bankastjórna verði að fara að lögum um jafnrétti kynjanna. Jafnframt skuli leggja áherslu á að kjör yfirstjórnenda verði endurskoðuð og þeim stillt í hóf.