Formaco segir upp 70 manns

Formaco sagði í gær upp öllum starfssamningum við starfsfólk. Uppsagnirnar taka til rúmlega 70 manns. Ástæðurnar eru samdráttur á byggingamarkaði. Formaco hefur framleitt glugga og flutt inn efni og búnað fyrir byggingarverktaka. Ragnar Jóhannsson, framkvæmdastjóri segir að einhver hluti starfsmanna verði endurráðinn í kjölfar endurskipulagningar.

„Þetta er nauðsynleg ráðstöfun eins og ástandið er í dag. Við þurfum að aðlaga fyrirtækið að breyttum aðstæðum á markaði. Vonandi getum við endurráðið sem flesta og flutt aðra til í starfi. En það er ljóst að ekki fá allir vinnu eftir endurskipulagningu. Hversu margir það verða get ég ekki sagt til um að svo komnu máli. Óvissan í þjóðfélaginu gerir að verkum að maður getur engar áætlanir gert,“ segir Ragnar Jóhannsson framkvæmdastjóri og einn eigenda Formaco.

Uppsagnarfrestur er mismunandi hjá starfsfólki, allt frá einum mánuði upp í sex mánuði.

Formaco er rúmlega tíu ára gamalt fyrirtæki og hefur framleitt álglugga, ásamt því að flytja inn glugga og tæki og búnað fyrir byggingaverktaka.

• 1 blogg um fréttina

Bloggað um fréttina

• Birgitta Jónsdóttir: Sameinuð stöndum við!