LÍÚ óskar eftir meiri kvóta

Björgólfur Jóhannsson, formaður Landssamband íslenskra útvegsmanna,  sagði á ársfundi samtakanna, að sambandið hafi farið fram á við sjávarútvegsráðherra að bætt verði 30 þúsund tonnum við aflamark yfirstandandi fiskveiðiárs.

Björgólfur gagnrýndi harðlega vaxtahækkun Seðlabankans úr 12 í 18% og sagði hana hafa verið ranga ákvörðun. Sagði hann að fyrirsjáanlegur væri mikill samdráttur í fjárfestingu og neyslu og við þær aðstæður þurfi að horfa fram á veginn en ekki í baksýnisspegilinn.

Björgólfur sagði, að fasteignabólan, sem hefði átt stóran þátt í verðbólgunni, væri sprungin. Eldsneytisverð, sem hefði verið mjög hátt á árinu, hefði lækkað mjög ört að undanförnu. Fyrirsjáanlegur væri mikill samdráttur í fjárfestingu og neyslu.

Björgólfur spurði hvaða ávinningur fælist í því fyrir íslenskt samfélag að kippa fótunum undan fyrirtækjum og heimilum og knýja þau jafnvel í þrot. Vaxtahækkun væri ekki trúverðug peningamálastefna heldur aðgerð sem væri til þess eins fallin að grafa undan hagkerfinu og fyrirtækjum og heimilum.

Í máli Björgólfs kom fram að efnahagsstefnan hlyti að koma til gagngerrar endurskoðunar á komandi vikum og mánuðum. Stjórnvöld yrðu að taka mið af stöðu atvinnuveganna og heimilanna.

Björgólfur sagðist einnig í ræðu sinni vera ósammála þeim sem vilja ganga í Evrópusambandið. ,,Við erum á hnjánum. Halda menn í einlægni að það sé einhver hundalúga á útihurð Evrópusambandsins?" spurði hann.

• 6 blogg um fréttina

Bloggað um fréttina

• Gunnar Th. Gunnarsson: Hagsmunaaðilar
• Sigurður Jónsson: Ríkið á að selja viðbótarkvótann.
• Hallgrímur Guðmundsson: Hernaðurinn gegn sjávarútveginum
• Hafsteinn Viðar Ásgeirsson: Vill fá krónuna í frjálst fall.
• Sigurður Þórðarson: LÍÚ óskar eftir meiri kvóta til að veðsetja
• Egill Jón Kristjánsson: Er magn kvóta nú orðið af samningsstærð við ríkið?