Hélt úr höfn án lögskráningar og trygginga

Varðskip Landhelgisgæslunnar stöðvaði á föstudag íslenskt skip á leið til Noregs og færði til hafnar í Þorlákshöfn. Enginn skipverja um borð var lögskráður, engin áhafnartrygging var í gildi og skipstjóri hafði ekki tilkynnt brottför, líkt og reglur segja til um.

Í tilkynningu Landhelgisgæslunnar segir að þetta sýni hve brýnt sé að hafa varðskip Landhelgisgæslunnar við eftirlit og löggæslustörf á hafi úti.

Varðskip LHG hafði samband við stjórnstöð LHG til að grennslast fyrir um skip á suðurleið undan Sandvík. Stjórnstöð taldi skipið vera við höfn í Reykjavík en við nánari eftirgrennslan kom í ljós að svo var ekki.

Haft var samband við skipið og í ljós kom að það hélt úr Reykjavíkurhöfn á föstudagsmorgunn og var á leið til Noregs með erlenda áhöfn um borð, var skipið þó skrásett á Íslandi og bar þar af leiðandi að fylgja íslenskum lögum.

Stýrimenn varðskipsins fóru um borð í skipið til eftirlits. Fjórir erlendir menn voru um borð, skipstjóri, stýrimaður og tveir vélstjórar.  Engin áhafnartrygging var í gildi, enginn skipverji lögskráður og gat aðeins skipstjóri framvísað norsku skírteini. Hafði skipið ekki tilkynnt sig til stjórnstöðvar LHG samkvæmt reglum þar að lútandi.

Var skipinu beint til Þorlákshafnar, auk þess sem lögreglu og Siglingastofnun var gert viðvart. Hélt skipið síðan úr höfn á laugardag eftir að gengið var frá málum þess hér á landi og komin var lögskráð áhöfn um borð.

Í tilkynningu LHG segir að fjareftirlit stjórnstöðvar LHG tryggi ákveðið öryggi sjófarenda en tilgangur þess er jafnframt að halda uppi löggæslu á sjó. Með þessu móti sé fylgst með skipaumferð og ef skip tilkynna ekki ferðir sínar megi segja að þau séu á eigin ábyrgð. Það geti í það minnsta seinkað björgunaraðgerðum ef neyðarsendir fer í gang á svæði þar sem ekki er vitað um neitt skip á sjó.

• 1 blogg um fréttina

Bloggað um fréttina

• Guðjón Sigþór Jensson: Grunsamleg brottför skips