Geta ekki lánað alla upphæðina

Rússar hafa ekki bolmagn til að lána Íslendingum fjóra milljarða Bandaríkjadollara, um 540 milljarða króna, að því er hátt settur rússneskur embættismaður skýrði frá í gærkvöldi.

„Fjórir milljarðar dala eru of mikið,“ sagði Dmítrí Pankin, aðstoðarfjármálaráðherra Rússlands í gær. 

Lagði Pankin sérstaka áherslu á dollara í þessu samhengi en fyrir nokkrum vikum var mikið rætt um möguleikann á fjögurra milljarða evra Rússaláni.

Íslensk sendinefnd hélt utan til Moskvu í síðasta mánuði til að ræða möguleika á láninu og urðu þær viðræður til að ýta undir áhuga annarra ríkja á að koma íslenska ríkinu til aðstoðar. 

Á vef dagblaðsins The Moscow Times er haft eftir Pankin að lokaákvörðun Rússa muni taka mið af ákvörðunum annarra lánveitenda, svo sem Alþjóðagjaldeyrissjóðsins og Norðurlandanna, að viðbættum aðgerðum Breta og Hollendinga í Icesave-málinu.

Fyrr í haust vísaði rússneska fjármálaráðuneytið á bug fréttum af viðræðunum við Íslendinga en staðfesti þær svo síðar eftir að Seðlabanki Íslands staðfesti að rætt hefði verið við Vladímír Pútín Rússlandsforseta um möguleika á láni. 

Þrátt fyrir olíuauð geta Rússar ekki lánað Íslendingum fjóra milljarða Bandaríkjadollara. Reuters

• Blogga um frétt