Almenningur vissi ekkert um fundinn

Engar fréttir voru í íslenskum fjölmiðlum í byrjun september sl. um vanda Icesave-útibús Landsbankans eða að bankinn ætti í viðræðum við breska fjármálaeftirlitið um að breyta útibúinu í dótturfélag.

FME hafði aðeins tveim vikum fyrr framkvæmt álagspróf sem sýndi sterka stöðu bankanna. Í Morgunblaðinu hinn 17. september, um svipað leyti og Baldur Guðlaugsson, ráðuneytisstjóri fjármálaráðuneytisins, seldi hlutabréf sín í Landsbankanum, birtist frétt í Morgunblaðinu um að breskir sparifjáreigendur treystu íslensku bönkunum betur en þeim bresku og innlánsreikningar íslensku bankanna í Bretlandi hefðu gildnað dagana á undan.

Bankastjórar sögðu stöðu góða

Sama dag, 17. september, sögðu Sigurjón Þ. Árnason og Halldór J. Kristjánsson að fjármögnun Landsbankans væri í góðu jafnvægi. Lausafjárstaðan væri sterk og myndi duga til að mæta öllum skuldbindingum í tólf mánuði. Sigurjón sagði að mjög vel hefði gengið að afla innlána og Icesave þar leikið stórt hlutverk. Vegna skorts á lánsfé yrði því lögð höfuðáhersla á innlán.

Viðskiptaráðherra fundaði með fjármálaráðherra Breta, Alistair Darling, hinn 2. september til þess að ræða málefni Icesave-útibús Landsbankans og Baldur sat fundinn.

„Það er misskilningur að fundurinn í London hafi snúist um stöðu Landsbankans,“ sagði Baldur í samtali við DV hinn 27. október. „Ég hafði þá [þegar hann seldi bréfin] engar upplýsingar um Landsbankann sem markaðurinn hafði ekki,“ sagði Baldur við Viðskiptablaðið 29. október.

Icesave meginefni fundarins

„[...] Þá óskaði ég eftir fundi með Alistair Darling til þess eins að semja við Bretana um að lækka kröfugerð sína á Landsbankann þannig að þeir gætu flutt Icesave-reikningana í dótturfélag [og] þar með undir breska innstæðutryggingavernd,“ sagði Björgvin G. Sigurðsson í kvöldfréttum RÚV 8. nóvember sl.

Helgi Hjörvar alþingismaður sendi Baldri tölvupóst í byrjun nóvember þar sem hann spurði hvaða dag Baldur hefði selt, hversu umfangsmikil viðskiptin hefðu verið og hvort hann hefði selt bréfin í eigin nafni eða í nafni dótturfélags. „Mér til undrunar neitaði hann að svara og gaf þá skýringu að hann teldi mig ekki hafa neitt eftirlitshlutverk í málinu,“ segir Helgi. „Ég minnti hann þá á eftirlitshlutverk Alþingis með störfum framkvæmdavaldsins og bað hann að endurskoða afstöðu sína, en án árangurs. Ég tel það einnig mjög ámælisvert að hann skyldi ekki upplýsa ráðherrann [Árna Mathiesen] um hlutabréfaeign sína í Landsbankanum.“

Í hnotskurn

» Baldur var innherji í skilningi laga um verðbréfaviðskipti er hann seldi hlutabréf sín í Landsbankanum ef hann bjó á þeim tímapunkti yfir upplýsingum sem hefðu haft áhrif á verð hlutabréfa bankans, væru þær opinberar.
» Velta má fyrir sér, ef Icesave-reikningurinn lék jafnstórt hlutverk í fjármögnun LÍ og raun ber vitni, hvort það hefði haft áhrif á verðmyndun á hlutabréfum ef almenningur hefði haft vitneskju um að viðskiptaráðherra hefði sérstaklega fundað með fjármálaráðherra Bretlands til þess eins að ræða Icesave.