Innlent | mbl | 24.11.2008 | 16:52 | Uppfært 17:08

LÍÚ hótar úrsögn úr SA

Stjórn Landssambands íslenskra útvegsmanna hefur samþykkt einróma, að verði Samtökum atvinnulífsins beitt fyrir inngöngu Íslands í Evrópusambandið muni stjórnin leggja það til við félagsmenn að LÍÚ segi sig úr Samtökum atvinnulífsins.

Þetta kemur fram í bréfi, sem sent hefur verið til félagsmanna LÍÚ og Samtaka fiskvinnslustöðva, í dag.

Segir þar, að frá því að Samtök atvinnulífsins voru stofnuð hafi það legið fyrir að samtökin beiti sér ekki í málefnum sem gangi gegn grundvallarhagsmunun einstakra aðildarsamtaka. Þess vegna hafi Samtök afvinnulífsins ekki tekið afstöðu með eða á móti inngöngu Íslands í Evrópusambandið.

Mikil breyting hafi nú orðið á málflutningi fyrirsvarsmanna Samtaka atvinnulífsins á síðustu mánuðum án þess að formlegri afstöðu samtakanna hafi verið breytt. Stjórnarmenn í Samtökum atvinnulífsins frá aðildarsamtökum í sjávarútvegi hafa eindregið farið þess á leit að Samtökum atvinnulífsins verði ekki beitt í málinu, heldur verði það verkefni einstakra aðildarsamtaka að halda skoðun sinni á lofti.

Nú hafi framkvæmdastjórn Samtaka atvinnulífsins ákveðið að fram fari skoðanakönnun meðal aðildarfyrirtækja um það hvort fyrirtækin vilja að Samtök atvinnulífsins beiti sér fyrir aðild Íslands að Evrópusambandinu.

„Við fórum þess á leit þegar ljóst var að ekki var stuðningur fyrir því í framkvæmdastjórn Samtaka atvinnulífisins að halda óbreyttri stefnu að aðildarfyrirtæki Samtaka atvinnulífsins verði spurð um það hvort þau vilji að Samtök atvinnulífsins beiti sér fyrir aðild að Evrópusambandinu og upptöku evru þrátt fyrir að því fylgi afsal á yfirráðum yfir fiskimiðunum við Ísland og að forræði á samningum um sameiginlega fiskistofna færist til ESB. Þessari ósk okkar var hafnað. Þá fórum við þess einnig á leit að spurt verði hvort aðildarfyrirtæki Samtaka atvinnulífsins séu hlynnt eða andvíg því að taka upp annan gjaldmiðil á Íslandi í stað krónu án inngöngu í ESB. Þessari ósk okkar var einnig hafnað," segir í bréfinu.

Undir það skrifa Adolf Guðmundsson formaður LÍÚ, Eiríkur Tómasson varaformaður LÍÚ, Friðrik J. Arngrímsson framkvæmdastjóri LÍÚ, Arnar Sigurmundsson formaður SF og Gunnar Tómasson varaformaður SF.