Farþegum milli Íslands og Færeyja fjölgar

Farþegum á milli Íslands og Færeyja hefur fjölgað mikið í september og október. Flugfélag Íslands segir, að í september hafi fjölgunin numið 27% miðað við sama tímabil í fyrra og í október fjölgaði flugfarþegum um 91%. Einnig stefni í mikla fjölgun í nóvember.  

Flug milli Færeyja og Íslands er samstarfsverkefni Flugfélags Íslands og færeyska flugfélagsins Atlantic Airways og er flogið er alla föstudaga og mánudaga á 90 sæta þotu á vegum færeyska félagsins.

Farþegar í september sl. voru 216 en voru 170 í sama mánuði á síðasta ári. Þá voru farþegarnir 190 í október nú en 99 í fyrra.  

Samkvæmt upplýsingum frá Flugfélagi Íslands var 44% söluaukning í október í fríhafnarverslun félagsins á Reykjavíkurflugvelli.  Í nóvember  var aukningin  97%.

Félagið segir að Færeyingum, sem fari í verslunar- og skemmtiferður til Íslands, hafi fjölgað mikið.  Einnig sé  aukning meðal íslenskra hópa á leiðinni til Færeyja. Hafi starfsfólk Flugfélags Íslands á Reykjavíkurflugvelli fundið fyrir mikilli aukningu á endurgreiðslu virðisaukaskatts, vegna kaupa á vörum á Íslandi.

• 1 blogg um fréttina

Bloggað um fréttina

• Emil Örn Kristjánsson: Vælkomnir Føroyingar