Innlent | mbl | 2.12.2008 | 22:44 | Uppfært 23:22

Myndi jafngilda stjórnarslitum

Úr þingsal Alþingis. Samfylkingarmenn á Akranesi fara fram á aukna umræðu um ESB-aðild. mbl.is/Ómar Óskarsson

Samfylkingarfélagið á Akranesi þrýstir á um umræðu um aðild að Evrópusambandinu. Sýni sjálfstæðismenn ekki áhuga á umræðu um aðild jafngildi það yfirlýsingu um að vilja slíta stjórnarsamstarfinu. Þetta kemur fram í nýrri ályktun félagsins.

Að sögn Hrannar Ríkharðsdóttur, formanns félagsins, var ályktunin borin upp á aðalfundi félagsins síðasta fimmtudagskvöld.

Hrönn segir ályktunina, sem hefur ekki birst fyrr opinberlega, hafa verið samþykkt einróma á fundinum, eftir „miklar og góðar umræður“.

Fara félagsmenn fram á að efnt verði til kosninga í síðasta lagi um mitt næsta ár en að þeirra mati hefur „hefur traust almennings á því stjórn- og eftirlitskerfi sem átti að tryggja öryggi fjármálakerfisins gersamlega brostið“ eftir hrun bankakerfisins og þá gjaldeyriskreppu sem nú sé uppi.

Telja félagsmenn að trúverðugleiki stjórnmálamanna og Alþingis hafi „einnig beðið mikið tjón“.

Í ályktuninni segir:

„Samfylkingin var stofnuð til að vera boðberi nýrra og opnari stjórnarhátta. Það er því hlutverk hennar að leiða endurreisnarstarfið og það uppgjör við mistök í fortíð og nútíð sem óumflýjanlegt er.

Samfylkingin á Akranesi telur að þær pólitísku forsendur sem lágu til grundvallar ríkisstjórnarsamstarfi Samfylkingarinnar við Sjálfstæðisflokkinn séu nú gjörbreyttar.

Samfylkingin á Akranesi telur nauðsynlegt að flokkurinn beiti sér nú af afli fyrir endurskoðun peningastefnu og gjaldmiðilsmála en jafnframt fyrir tafarlausri endurnýjun í fjármálaeftirliti, bankaráði og bankastjórn Seðlabankans. Hraða verður rannsókn á bankahruninu og fylgja því fast eftir að þeir axli ábyrgð sem hana bera.“

Samfylkingarmenn á Akranesi leggja sérstaka áherslu á að forysta flokksins fari fyrir umræðu um ESB-aðild.

„Í ljósi nýrra aðstæðna telur hún að ef samstarfsflokkurinn í ríkistjórn tekur ekki afstöðu með hugmyndum Samfylkingarinnar í Evrópumálum sé hann í raun að slíta stjórnarsamstarfinu. Um leið leggur þetta Samfylkingunni þá skyldu á herðar að tryggja þjóðareign á auðlindum landsins með ákvæði í stjórnarskrá og að þess eignarhalds verði gætt að fullu fyrir hönd þjóðarinnar. Takist þetta ekki þarfnast Alþingi leiðsagnar þjóðarinnar og að kosningar verði því að fara fram í síðasta lagi um mitt ár 2009.“

Vikið er að erfiðri skuldastöðu heimilanna og hættunni á fjöldagjaldþrotum í atvinnulífinu.

„Á þeim erfiðu tímum sem nú blasa við ber jafnaðarmönnum að standa vörð um heimilin, atvinnulífið í landinu og velferð þjóðarinnar. Hafna skal með öllu kröfum, sem stefna velferðarkerfinu í hættu og leita strax allra leiða til þess að draga úr atvinnuleysi og níðþungri skuldabyrði almennings. Öllu verður til að kosta að afstýra fjöldagjaldþrotum heimilanna í landinu. Frá þessum markmiðum má ekki hvika.“

Ingibjörg Sólrún Gísladóttir, utanríkisráðherra og formaður Samfylkingarinnar. Flokkssystkin hennar á Akranesi vilja að forysta flokksins taki af skarið í umræðum um ESB-aðild. mbl.is/Brynjar Gauti