Kjölur varar við lokun Sels

Stjórn Kjalar, stéttarfélags starfsmanna í almannaþjónustu, varar við lokun hjúkrunardeilarinnar í Seli við Sjúkrahúsið á Akureyri (FSA), en stjórn FSA ákvað fyrir skemmstu að loka deildinni um áramótin og flytja þá 12 sjúklinga, sem þar eru, á öldrunardeild FSA í Kristnesi í Eyjafirði.

Ályktun sem stjórn Kjalar sendi frá sér síðdegis hljóðar svo:

„Lokun deildarinnar og flutningur skjólstæðinga hennar hefur viðtæk áhrif svo sem á hjúkrun sjúklinga í heimahúsum og endurhæfingu sjúklinga þar sem bið eftir henni lengist og veldur það öllu samfélaginu tjóni. Að auki kemur það þvert á stefnu í öldrunarmálum að fleiri einstaklingar deili herbergjum saman á öldrunarheimilum.

Sú ákvörðun stjórnenda FSA að hætta starfssemi í Seli með svo skömmum fyrirvara hefur í för með sér uppsagnir og verulega skerðingu á þjónustu og gengur þvert á það sem nú er brýnast að gera, stórefla velferðarþjónustuna og styrkja öryggisnet fjölskyldnanna.

Stjórn KJALAR stéttarfélags starfsmanna í almannaþjónustu, skorar á stjórnendur FSA að draga ákvörðun sína til baka og leita annarra leiða til hagræðingar í samráði við starfsfólk heilbrigðisþjónustunnar, samtök launafólks, fjöldahreyfingar sjúklinga, öryrkja, eldri borgara og annarra aðila sem hagsmuna hafa að gæta varðandi gæði og skilvirkni heilbrigðiskerfisins.“

• 3 blogg um fréttina

Bloggað um fréttina

• Ólafur Gunnarsson: Fangar rétthærri en sjúk gamalmenni
• Anna Dóra Gunnarsdóttir: Það var og !
• Guðrún María Óskarsdóttir.: Viðvörun um niðurskurð í velferðarþjónustu.