Auglýsti andlát samfanga síns

Refsifangi á Litla Hrauni er grunaður um að hafa sent til­kynn­ingu um and­lát sam­fanga síns en til­kynn­ing­in birt­ist í Morg­un­blaðinu í  morg­un. Birt er reikn­ings­núm­er með til­kynn­ing­unni í þeim til­gangi að fé verði lagt inn á reikn­ing­inn.

Í Morg­un­blaðinu í dag birt­ist til­kynn­ing um and­lát Hákons Rún­ars Jóns­son­ar en hann afplán­ar nú nokk­urra mánaða fang­els­is­dóm á Litla Hrauni. Í aug­lýs­ing­unni seg­ir að maður­inn hafi lát­ist eft­ir langvar­andi veik­indi og er þeim sem vilja minn­ast hans bent á reikn­ings­núm­er. Reikn­ing­ur­inn og kennitala sem upp er gef­in er í eigu Sig­ur­björns Adams Bald­vins­son­ar, fanga á Litla Hrauni en hann afplán­ar dóm fyr­ir marg­háttuð af­brot.

Aug­lýs­ing­in er upp­spuni frá rót­um og virðist hafa verið send frá Litla Hrauni í þeim til­gangi ein­um að svíkja út fé af fólki. 

Páll Win­kel, fang­els­is­mála­stjóri seg­ist ekki muna eft­ir öðrum eins ósóma. „Þetta er með því ósmekk­legra sem ég hef séð. Málið verður ranna­sakað til hlít­ar. Strax í morg­un voru tölv­ur fanga sem grunaðir eru um verknaðinn, hald­lagðar og verða þær skoðaðar. Þá verða tekn­ar skýrsl­ur af föng­un­um en málið verður síðan af­hent lög­reglu,“ seg­ir Páll Win­kel, fang­els­is­mála­stjóri.

Páll seg­ir að fang­ar hafi tölv­ur á her­bergj­um sín­um og tak­markaðan aðgang að net­inu vegna fjar­náms en þá und­ir eft­ir­liti. Hins veg­ar fær­ist í vöxt að svo­kölluðum net­p­ung­um sé smyglað inn í fang­elsið, en þeir tengja tölv­ur við netið með svo­kölluðu 3G sam­bandi. Páll seg­ir að tölu­vert sé um að slík­ir net­p­ung­ar séu hald­lagðir. Sama á við um farsíma­notk­un fanga, farsím­ar eru bannaðir inn­an veggja fang­els­anna. Nokkr­ir sím­ar eru hald­lagðir í hverj­um mánuði.

Páll Win­kel seg­ir að agaviður­lög verði ákveðin gagn­vart föng­un­um þegar málið hafi verið rann­sakað til hlít­ar. Þá seg­ir hann ekki ólík­legt að brot fang­anna leiði til end­ur­skoðunar á tölvu­notk­un refsifanga í fang­els­um lands­ins.

Morg­un­blaðinu þykir miður að hafa verið blekkt með þess­um hætti. Reikn­ingn­um sem nefnd­ur er í aug­lýs­ing­unni, hef­ur verið lokað.

• 13 blogg um frétt­ina

Bloggað um frétt­ina

• Sig­ur­björg: Dán­ar­til­kynn­ing?
• Karl Jóns­son: Ný­stár­leg fjár­öfl­un
• Heiðar Már Guðlaugs­son: Ósmekk­legt en fyndið
• Stefán Friðrik Stef­áns­son: Siðlaus og ósmekk­leg dán­ar­til­kynn­ing
• Ingimar Eggerts­son: Bráð fyndið.
• Berg­ur Thor­berg: Ekki í fyrsta skipti....
• Jó­hann­es Ragn­ars­son: Blá­fá­tæk­ur tukt­húsmaður fórn­ar­lamb armanikrimma
• Björn Finn­boga­son: Skömm­inni skárra en hluta­bréfa­kaup þó!
• Brynja Dögg Ívars­dótt­ir: And­lát­stil­kynn­ing­ar
• María Anna P Kristjáns­dótt­ir: Ástkær sam­býl­is maður minn á Litla Hrauni...
• Krist­berg Snjólfs­son: Ekki er öll vit­leys­an eins
• Þór­ar­inn M Friðgeirs­son: Aug­lýsti and­lát sam­fanga síns - allt er nú til..
• Þor­geir Páls­son: Dán­ar­til­kynn­ing