Segja fjölda nýbygginga ýktan

Landsbankinn fékk verkfræðinema til þess að gera ítarlega talningu á fjölda ónotaðra íbúða á höfuðborgarsvæðinu og í nágrannabyggðum vegna þeirrar óvissu sem hefur ríkt um fjölda þeirra. Einbýlishús voru ekki talin með. 

Niðurstaða talningarinnar er sú að fjöldi tilbúinna íbúða er 1.241 á höfuðborgarsvæðinu, Reykjanesbæ, Árborg/Selfossi, Hveragerði og Akranesi. Fjöldi fokheldra íbúða er 509 og 1.250 íbúðir eru í byggingu.

Segir á vef Samtaka iðnaðarins að tölur um magn íbúðahúsnæðis í byggingu á Íslandi hafi að verulegu leiti verið byggðar á ágiskunum og erfitt hafi reynst að fá áreiðanleg gögn þar að lútandi. Tölur á borð við fjögur til sjö þúsund hafi gjarnan verið nefndar.

Ari Skúlason í þróunar- og árangursstjórnun Landsbankans hafði umsjón með talningunni. Hann segir á vef Samtaka iðnaðarins að bestu fáanlegu skipulagsgögn hafi verið notuð til grundvallar.

Verkfræðinemarnir hafi gengið um svæðin og merkt inn á opinberu gögnin hver staða hvers húsnæðis væri og hvort einhver byggi í íbúðunum. Stundum hafi verið erfitt að meta hvort íbúar byggju í íbúðunum: „En við létum vafann ráða því við þurftum að vera 100% viss um að hún væri ekki í notkun,“ segir á vef Samtaka iðnaðarins.

• 2 blogg um fréttina

Bloggað um fréttina

• Þórarinn M Friðgeirsson: Þarfagreining er málið - kannski aðeins of seint í rassinn …
• Friðrik Hansen Guðmundsson: Það vantar nýjar íbúðir ef eitthvað er