Innlent | mbl | 15.12.2008 | 13:16 | Uppfært 14:02

Þungir dómar í Keilufellsmáli

Sakborningar ásamt verjendum í Héraðsdómi Reykjavíkur nýlega. mbl.is/Ómar.

Héraðdómur Reykjavíkur dæmdi einn sakborning í Keilufellsmálinu svonefnda í þriggja og hálfs árs fangelsi og þrír sakborningar voru dæmdir í 2,5 ára fangelsi. Mennirnir fjórir voru einnig dæmdir til að greiða mönnum, sem þeir réðust á, skaðabætur á bilinu 675 þúsund til 1,5 milljóna króna.

Sá sem þyngsta dóminn hlaut heitir Tomasz Krzysztof Jagiela en hinir heita Marcin Labuhn, Robert Kulaga og Tomasz Roch Dambski.

Samkvæmt ákæru voru fjórmenningarnir í hópi 10-12 manna sem ruddust með bareflum inn á heimili að Keilufelli 35 í Breiðholti þann 22. mars síðastliðinn og réðust þar á sjö menn sem voru í íbúðinni fyrir. Við árásina, sem var sérlega gróf, notuðu þeir ýmis vopn og barefli, svo sem járnstöng, járnrör, hamar, sleggju, gaddakylfu, golfkylfu, hafnaboltakylfu, hníf og öxi.

Árásarmennirnir eru frá Póllandi og eru þeir sem urðu fyrir árásinni einnig pólskir. Einn þeirra var fluttur alvarlega slasaður á sjúkrahús í kjölfarið með áverka á höfði og samfallið lunga. Aðrir sátu eftir með ýmsa áverka, s.s. skurði á höfði, brotinn augnbotn og andlitsbein auk þess sem einn þeirra brotnaði á báðum höndum. Taldi lögregla að tilefni árásarinnar hafi verið innheimta verndartolls.

Í ákærunni kom fram að líkamsárásin hafi verið sérstaklega hættuleg og þess sé krafist að ákærðu verði dæmdir til refsingar. Þá krefjast fórnarlömbin skaðabóta.